Estruturas, Forzas e Mecanismos

Definicións

Forza: capacidade de deformar un corpo ou alterar o seu estado de movemento ou repouso.

Estrutura: conxunto de elementos dun corpo destinados a soportar os efectos das forzas que actúan sobre el. A estrutura impide que o corpo rompa ou se deforme en exceso.

Esforzo: tensión interna que experimentan todos os corpos sometidos á acción dunha ou de varias forzas. As forzas que actúan sobre unha estrutura chámanse cargas.

Polea: roda cunha rañura que xira arredor dun eixo, o cal se atopa suxeito a unha superficie fixa. Pola rañura da polea faise pasar unha corda, cadea ou correa que permite vencer de maneira cómoda unha resistencia.

Panca: barra ríxida que xira arredor dun punto de apoio ou articulación. Nun punto da barra aplícase unha forza coa fin de vencer unha resistencia.

Mecanismos: elementos destinados a transmitir e transformar forzas e movementos desde un elemento motriz a un elemento receptor.

Tipos de Cargas

Existen dous tipos de cargas:

• Permanentes: non varían co paso do tempo, sempre afectan a estrutura da mesma maneira. Son, por exemplo, o propio peso, o dos corpos que se atopan enriba, etc.
• Variables: aparecen ocasionalmente e non teñen sempre o mesmo valor. Algúns exemplos son o peso da neve sobre un tellado, o pulo do vento, o peso da xente que se atopa nun edificio, o peso dunha caixa que erguemos do chan, o pulo da auga dun encoro...

Tipos de Esforzos

Existen diferentes esforzos:

• Tracción: estirar.
• Compresión: comprimir ou apertar.
• Flexión: dobrar o corpo.
• Torsión: retorcer.
• Cizalla ou cortante: cortar.

Características das Estruturas

As estruturas deben ter:

• Estabilidade
• Resistencia
• Rixidez

(Ver definición de estrutura)

Tipos de Poleas

Hai poleas móbiles e fixas (ver definición de polea).

Tipos de Pancas

As pancas (ver definición) clasifícanse en:

• Primeiro grao: o punto de apoio atópase entre a forza aplicada e a resistencia.
• Segundo grao: a resistencia atópase entre o punto de apoio e a forza aplicada.
• Terceiro grao: a forza aplicada atópase entre o punto de apoio e a resistencia.