Fundamentos de las Técnicas Artísticas y la Imagen Digital

O punto e o puntillismo

O punto alcanza verdadeira importancia no puntillismo. É o elemento principal nas obras dos artistas puntillistas.

O puntillismo é unha técnica de pintura que consiste en pintar pequenos puntos de cores, no lugar de pinceladas. Ao contemplar o cadro a distancia, os puntos mestúranse formando a imaxe desexada polo artista. Se nos fixamos ben, veremos que este cadro está pintado a partir de puntos de cores. Ao afastarse, a vista mestura as cores e forma a composición.

O cubismo e a descomposición da forma

No cubismo, o plano é o elemento principal á hora de compoñer, xa que o artista descompón as figuras en múltiples planos. É un movemento artístico do século XX. Os seus principais representantes son: Pablo Picasso, Fernand Léger, Georges Braque e Juan Gris. Nas súas obras, a pintura está definida polas formas, sobre todo as xeométricas.

A técnica da colaxe

Utilizábase moito a técnica da colaxe, integrando nas súas obras cachos de xornais, papeis decorativos de parede e incluso etiquetas de produtos.

A colaxe (da palabra francesa coller, que significa «pegar») é unha técnica artística na que as obras están compostas por diversos fragmentos. Realízase mesturando pintura con diferentes materiais como papel, cartón, tea, xornais... e pegándoos sobre un soporte.

A imaxe dixital

As cámaras fotográficas dixitais, os escáneres e os programas de tratamento de imaxes por ordenador xeran imaxes dixitais. Divídense en dous tipos:

• Imaxe bitmap (mapa de bits).
• Imaxe vectorial.

A imaxe bitmap está formada por unidades moi pequenas chamadas píxeles. O píxel é dunha soa cor e pódese ver se ampliamos moito unha imaxe. Son os cadrados uniformes que veremos e que dan o tamaño á imaxe (mídese o alto polo ancho e tamén se poden utilizar os centímetros ou os milímetros).

Unidades de medida e resolución

As unidades de medida do píxel son:

• Megapíxel (Mpx): 1 000 000 de píxeles.
• Xigapíxel (Gpx): 1000 megapíxeles.

Por exemplo, se temos unha cámara que tira fotos de 1600 x 1200 píxeles, quere dicir que tira fotos de 1 920 000 píxeles; isto significará que temos unha cámara de 1,92 megapíxeles.

Resolución de imaxe: Como se pode deducir, a calidade da imaxe vén dada polos píxeles por pulgada (ppp): a maior resolución, maior calidade de imaxe. Por exemplo, unha imaxe de 150 ppp indica que en cada pulgada cadrada hai 150 x 150 píxeles (22 500 píxeles). É unha boa resolución para unha imaxe impresa; unha imaxe a 72 ppp é de menor resolución e ten menor capacidade de facer zoom nela para ver os seus detalles.