Técnicas de relaxación: ioga, tai-chi, respiración, Jacobson e masaxe para reducir o estrés

Técnicas de relaxación

Imos coñecer brevemente algunhas das técnicas fundamentais:

Ioga

Ioga é o antepasado máis antigo da relaxación. Os ioguis da India, o Tíbet ou do antigo Exipto xa coñecían a relación entre a distensión muscular e a relaxación mental, e que unha non é posible sen a outra. Consiste nunha serie de posicións físicas, coordenadas cunha adecuada respiración e concentración mental. Estas posturas, ou asanas, teñen como obxectivo o dominio do corpo co fin de controlar a nosa mente e, desta forma, lograr a harmonía física e mental.

Tai-Chi

O Tai-Chi xorde na antiga China en torno ao século XIII; é unha secuencia de movementos executados un tras outro, coma se fose un só. A respiración desempeña un papel esencial, tratando de desbloquear os puntos de tensión. O Tai-Chi foi ideado para que as forzas positivas (yin) e negativas (yang) entren en harmonía perfecta, controlando así automaticamente o chi e a mente.

Relaxación respiratoria

Moitas culturas orientais traballaron a respiración como base da meditación e das artes marciais. Unha respiración correcta garántenos unha mellor osixenación, un ritmo pausado e equilibrado, evitando o cansazo e a fatiga. A respiración é a primeira técnica de relaxación que se debería aprender e practicar con corrección. Debemos tomar conciencia da nosa respiración, realizando o proceso de forma consciente.

Relaxación progresiva de Jacobson

A relaxación progresiva de Jacobson parte do traballo en distintos segmentos corporais mediante a educación do sentido muscular, co propósito de relaxalos. Para este autor, relaxarse significa aprender a obter o máximo rendemento co mínimo gasto enerxético. O individuo alcanza o estado de relaxación tomando conciencia da sensación provocada polas contraccións e descontraccións musculares.

Relaxación pola masaxe

A relaxación pola masaxe

Recentemente, a ciencia demostrou os efectos bioquímicos da masaxe e xa ninguén nega os seus efectos beneficiosos:

• Efectos nerviosos: a masaxe diminúe a tensión, favorecendo así o equilibrio nervioso.
• Favorece a relaxación cando os músculos están fatigados ou en tensión.
• Axuda a recuperar lesións musculares.