Beroketa: Garrantzia, motak eta aholkuak

Zer da beroketa?

Beroketa, entrenamendu edo lehiaketa baten aurretik egiten den ariketa edo ekintza kopurua da, eta bere helburua, ondoren egingo diren esfortzuetarako gorputza prestatzea da.

Beroketa "ohitura" bilakatu behar da, inprobisazioak alde batera utzi eta kirolaria ondoren egin behar duen ariketan kontzentratu eta buru-belarri sartu behar da.

Aurreko guztia kontuan izanik, beroketak bi helburu nagusi dituela esan dezakegu:

1. Ondoren egingo dugun esfortzu baterako pertsona fisikoki, fisiologikoki eta psikologikoki prestatzea.
2. Lesio arriskua saihestea.

Beroketaren eraginak gorputzean

Beroketa bat egiteak ondorengo eraginak sortzen ditu gorputzean:

• Bihotzaren taupadak igotzen ditu eta, ondorioz, giharretara odol gehiago bidaliko du.
• Birikek oxigeno gehiago har dezaten errazten du, eta hau beharrezkoa da ariketa fisikoa egiteko.
• Gihar, giltzadura eta lotailuen tenperatura igotzen du, hauen mugimenduak erraztuz.

Beroketa: kontuan hartu beharrekoak

• Beroketa bat beti korrikaldi suabe batekin hasi behar da organismoa prestatu eta gorputzeko tenperatura igotzeko.
• Gorputzeko atal guztiak mugiarazi behar ditugu.
• Ez ahaztu luzaketa ariketak egitea.
• Progresiboa izan behar da.

Beroketa motak

• Beroketa orokorra: edozein jarduera egiteko berdintsua izan daitekeena; korrikaldi, mugimendu orokor eta luzaketa orokorrez osatua. Iraupena: 8-10 minutu.
• Berariazko beroketa: ondoren egingo dugun jardueraren ezaugarrietara moldatu beharko dugun beroketaren fasea, hau da: zati nagusian besoak asko erabiltzen baditugu, hauek gehiago berotuko ditugu; jarduerak sprint-ak baditu, sprint-ak landuko ditugu, baina motzagoak eta suabeagoak.

Luzaketa zehatzagoak ere egin beharko ditugu fase honetan.

Iraupena: ondorengo ariketa zenbat eta intentsuagoa izan, orduan eta luzeagoa izango da, 5-15 minutu.

Bestalde, kontuan izan behar da beroketaren efektuek 20-30 minutu irauten dutela, beraz, hobe 10-15 minutu baino lehenago zati nagusiarekin hastea.

Beroketaren iraupen eta ezaugarrietan kontuan hartu behar dira ere: eguneko momentua, giroko tenperatura, pertsonaren adina, entrenamendu maila, jarrera edo motibazioa.