Descartesen Filosofia: Ezagutza, Ziurtasuna eta Metodoa

Ezagutzaren Oinarriak Zalantzan: Antzinatik Descarteseraino

Eszeptikoak kenduta, filosofo guztiek sinesten zuten gizakiok errealitatea ezagutzeko daukagun gaitasunean. Guztiek (Platon eta Aristoteles barne) uste zuten Mundua badagoela (erreala dela) eta, gainera, arrazionala denez, ezagugarria eta adigarria dela.

Erdi Aroko filosofoek giza ezagutzaren gaitasunarekiko mesfidantza sustatu zuten, arrazoiaren autonomia oztopatzen zuen kanpoko irtenbide bat eskainiz: Jainkoa.

Descartesen Proposamena: Ziurtasuna Helburu

Descartesek, bere filosofian, Erdi Aroko planteamenduaren kontra egingo du, arrazoiaren autonomia aldarrikatuz. Baina ez da pentsalari greziarren konfiantza inozoarekin konformatuko. Berak ezagutzari, egiazkoa izateko, ziurra izatea exijitzen dio, zalantzaezina.

Zalantza Metodikoa

Ziurtasunaren arazo horren atzetik ikusmolde subjektibista modernoa daukagu: subjektu ezagutzaileaz gain, ez da ezer ziurtzat emango hasieratik. Baina ez da zalantza eszeptikoa izango (benetakoa), metodikoa baizik, filosofia berriaren oinarriak zalantzaezinak izatea helburu duena.

Arrazoimena eta Metodo Matematikoaren Beharra

Antzinaroko (Platon eta Aristoteles) eta Erdi Aroko filosofoei jarraituz, eszeptizismoaren kontra doa, gizaki guztion atributu edo kualitate den arrazoimenak errealitateari buruzko ezagutza unibertsal eta sendoa lor dezakeela azpimarratuz.

Baina, errealitate horretara iristeko ezinbesteko baldintza da metodo on bat erabiltzea, lortutako egia ziurra izan dadin. Horregatik, ezagutza ziurra eta unibertsala lortzeko, pentsamendua gidatuko duen metodo matematikoa erabili behar zela zioen, metodo horri esker gertatu baitzen Zientzia Modernoaren garapena.

Matematika, Zientzia Eredugarria

Descartes Zientzia Modernoaren garapenak eraginda zegoen, eta zientzia horien artean bere arreta deitzen zutenak matematikak ziren, adostasunari eta argitasunari dagokienez diziplina eredugarriak iruditzen zitzaizkiolako.

Ez zuen zalantzarik matematiken edukiak nabarmen, zehatz eta koherente egiten zituena haien metodoa zela. Beraz, beste edozein eremutan aurrerapenak egin nahi izanez gero, metodo hori jarraitu behar zela.