Enerxías convencionais e alternativas

Fontes de enerxía convencionais: a electricidade

A electricidade considérase imprescindible para o funcionamento de todos os equipos electrónicos actuais e para cubrir as nosas necesidades de calor e luz. É unha das formas de enerxía máis estendidas na actualidade por tres razóns principais:

• Transpórtase con facilidade a longas distancias.
• É limpa, polo menos no lugar en que se utiliza, onde non xera residuos.
• Convértese con facilidade en calquera outro tipo de enerxía: calorífica, luminosa, química e mecánica a través de motores eléctricos.

Formas tradicionais de obter electricidade

• Enerxía térmica: créase nas centrais térmicas. Nelas quéimase combustible, e a calor producida pola combustión quenta auga e xera vapor de auga a alta presión. Este chorro de vapor de auga move unhas turbinas, que están conectadas a xeradores eléctricos que producen a electricidade.
• Hidroelectricidade: utiliza a forza da auga para obter electricidade. A auga acumúlase en encoros e constrúense presas nos puntos máis estreitos. Na parte máis externa da presa faise pasar a auga polas aspas dunha turbina e prodúcese electricidade cando as aspas xiran. A enerxía hidroeléctrica é a enerxía renovable máis utilizada. Algúns países son grandes produtores de hidroelectricidade como Canadá, Estados Unidos, Brasil e China.
• Enerxía nuclear: prodúcese a partir da fisión, ou ruptura dos átomos, de minerais radioactivos, sobre todo de uranio. Iso produce grandes cantidades de calor. Esta calor utilízase para quentar auga e xerar vapor de auga a alta presión, que move unhas turbinas e xera electricidade. O proceso de fisión lévase a cabo nas centrais nucleares.

Problemas ambientais das enerxías convencionais

A explotación das enerxías convencionais causa graves problemas ambientais:

• O uranio é altamente contaminante.
• A hidroelectricidade é unha enerxía limpa, pero para producila hai que construír encoros e presas, que alteran a paisaxe e a forma de vida das zonas onde se constrúen.
• A queima de combustibles fósiles está a provocar o cambio climático.

As enerxías alternativas

Nos últimos anos puxéronse en marcha enerxías alternativas para obter electricidade. Son enerxías renovables e menos contaminantes cás convencionais. O custo do combustible é cero e non se esgotan pola súa explotación. As principais son:

• Enerxía eólica: a forza do vento move as aspas duns enormes aparellos que están conectados a un xerador eléctrico. Os aeroxeradores poden ser terrestres ou mariños, e requiren que o vento sexa constante, polo que non se poden instalar parques eólicos en calquera lugar.
• Enerxía solar: produce enerxía eléctrica aproveitando a radiación do sol e presenta dúas variantes:
  • Solar térmica: utiliza paneis solares que captan os raios do sol e teñen uns tubos polos que circula a auga, que quenta e que se pode almacenar para o seu uso.
  • Solar fotovoltaica: emprega paneis solares para producir enerxía eléctrica directamente a partir do sol.
• Biomasa e biogás: para obter enerxía eléctrica quéimanse os residuos orgánicos. Tanto os gases producidos pola descomposición destes residuos coma a calor que desprenden utilízanse para mover unhas turbinas, que xeran electricidade.
• Enerxía xeotérmica: a calor interna da Terra utilízase para producir electricidade ou nos sistemas de climatización.
• Enerxía mareomotriz: baséase no aproveitamento das mareas para producir electricidade. As centrais funcionan como un encoro tradicional. O elevado custo de mantemento frea o seu desenvolvemento. A enerxía das ondas tamén se pode aproveitar.