Enpresa Planaren Egitura eta Edukia

Enpresa Planaren Egitura

Enpresa plan batek honako atal hauek izan behar ditu:

• Proiektuaren aurkezpena.
• Merkatu azterketa.
• Marketin plana.
• Ekoizpen eta kalitate plana.
• Giza Baliabideen plana.
• Plan ekonomiko finantzarioa.
• Lan arriskuen prebentzio plana.
• Proiektuaren bideragarritasunaren analisia.
• Eranskinak.

1. Proiektuaren aurkezpena

Alderdi hauek jaso behar ditu:

• Oinarrizko datuak: Enpresaren izena eta kokapena.
• Produktuen edo zerbitzuen deskribapena.
• Produktua edo zerbitzua zein eremu eta merkatutara bideratuko dugun.
• Alderdi ekonomiko orokorrak: Inbertsioa, finantzazioa…
• Lortu nahi ditugun helburuak.
• AMIA matrizea: BARNE AZTERKETA (ahuleziak, indarrak) eta KANPO AZTERKETA (mehatxuak, aukerak).

2. Merkatu azterketa

Merkatu-azterketak alderdi hauek jaso behar ditu:

• Ingurunearen analisia: Unean uneko egoera sozioekonomikoa, biztanleriaren bilakaera, indarrean dagoen legeria eta abar aztertzen dira.
• Sektoreari buruzko alderdi orokorrak: Sektorean eskaintzen diren produktu eta zerbitzuak, osagarriak nahiz ordezkoak, merkatuaren hazkundea edo atzeraldia, eta merkatuan eragina izan dezaketen faktoreak aztertzen dira.
• Bezero potentzialak: Merkatu-azterketan zehaztu behar da nor diren bezero potentzialak eta zer ezaugarri dituzten.
• Lehiakideen analisia: Sustatzaileak izango dituen lehiakideak, beraien indarrak eta ahuleziak, kokapena, etab. jakin behar dira.
• Merkatuan sartzeko oztopoak: Merkatuan sartu aurretik bideragarritasuna aztertzeko eta produktuak edo zerbitzuak merkatuan izango duen indarra ebaluatzeko.

3. Marketin plana

Marketin-plana, azterketa ekonomiko-finantzarioan jasotako fakturazio zenbatekoa lortzeko merkaturatze estrategiak finkatzen dituen dokumentua da. Horretarako, marketing mixaren lau alderdiak landu behar dira: produktua, prezioa, sustapena eta banaketa (Product, Price, Promotion, Place).

Marketin-planak atal hauek izan behar ditu:

• Merkaturatuko den produktuaren edo zerbitzuaren deskribapena.
• Prezio estrategia: Lehiakideen prezioekin alderatzea garrantzitsua da.
• Errentagarritasunaren kalkulua: Enpresak mozkinak lortzeko behar dituen salmenta maila neurtzea.
• Salmenta politika: Salmenta taldearen osaera eta kualifikazioa definitzea, bezeroen kobratzeko epeak zehaztea, etab.
• Sustapen edo publizitate politika.
• Banaketa bitartekoak: Banaketa kostuen zenbatekoa zehaztea, esportatzeko aukerak analizatzea, etab.
• Salmenta osteko zerbitzua eta bezeroen arreta.