Formación de Cordilleiras e Tipos de Rochas Ígneas

Formación de Cordilleiras

A formación de cordilleiras pode ser de dous tipos principais:

Cordilleiras de Tipo Andino

Orixínanse nas marxes dun continente, onde a litosfera oceánica subduce baixo a litosfera continental. Tamén se chaman oróxenos de bordo continental. Os Andes son o mellor exemplo.

Proceso de Formación

1. Sedimentos e rochas sedimentarias mariñas sen deformar avanzan á zona de subdución.
2. A maioría dos sedimentos non subduce; dóbranse, fractúranse e acumúlanse, formando o prisma de acreción, que se incorpora ao continente.
3. A calor pola fricción das placas e a presenza de auga favorecen a fusión parcial das rochas, formando magmas.
4. Parte do magma sae á superficie e orixina volcáns; outra parte solidifica no interior e dá lugar a plutóns que engrosan a codia.
5. Altas presións e temperaturas causan o metamorfismo dalgunhas rochas.

Cordilleiras de Tipo Alpino

Prodúcense cando dúas litosferas continentais converxen e coliden. Exemplos notables son os Alpes, o Himalaia e os Urais. Comeza sendo igual ca a andina, pero neste caso a placa que subduce posúe un tramo oceánico e outro continental tras el. O maior grosor e a menor densidade da codia continental dificultan a súa subdución. Tras a colisión continental, prodúcese a incrustación e o cabalgamento dun continente sobre o outro, o que pode chegar a duplicar a codia continental.

Rochas Ígneas Plutónicas

Orixínanse no interior terrestre. O magma arrefría moi lentamente e atópanse ben cristalizadas. A súa textura é sempre holocristalina e fanerítica, podendo ser homométricas ou heterométricas.

• Granito

  É a rocha plutónica máis abundante, constituíndo boa parte da codia continental. De cor gris ou rosada, os seus minerais principais son cuarzo, ortosa, plaxioclasios e micas, podendo tamén conter anfíbolos.

• Sienita

  De cor rosada pola ortosa, o seu compoñente maioritario. Ademais, contén plaxioclasios e biotita, e pode ter anfíbolos. A diferenza do granito, non contén cuarzo.

• Diorita

  De cor gris, composta fundamentalmente por plaxioclasios. Pode conter pequenas cantidades de biotita, anfíbolo e, ás veces, piroxenos.

• Gabro

  De cor escura, composta por plaxioclasios e piroxenos. Pode conter biotita e olivina.

• Peridotita

  De cor moi escura, é moi pouco frecuente na codia terrestre. Constitúe o manto e é a rocha máis abundante do planeta. Está formada por piroxenos e olivino.

Rochas Ígneas Volcánicas

Orixínanse do magma que alcanza a superficie. O seu arrefriamento é moi rápido, polo que cristalizan mal. Presentan texturas hipocristalinas ou vítreas e afaníticas. Os gases que saen co magma deixan ocos nas rochas, creando unha textura vacuolar.

Clasificación

• Rochas Hipocristalinas

  Caracterízanse por ter cristais inmersos nunha matriz vítrea.

  • Basalto: É a rocha volcánica máis abundante, esténdese polos fondos oceánicos. A súa composición é similar á do gabro. De cor escura, case negra, presenta unha matriz microcristalina ou vítrea, na que se diferencian cristais de gran tamaño (fenocristais).
  • Andesita: De cor gris, a súa composición é similar á da diorita. Abunda nos Andes.
  • Riolita: De cor clara, a súa composición é similar á do granito.
  • Traquita: De cor clara, a súa composición é similar á da sienita.

• Rochas Vítreas

  Caracterízanse por ser unha masa amorfa con aspecto de vidro.

  • Obsidiana: É o nome xenérico das rochas volcánicas de textura vítrea con poucos ocos ou sen eles. De cor negra, presenta fractura concoidal e a súa composición é moi variable.
  • Pumicita ou Pedra Pómez: Rochas volcánicas con textura vacuolar e cor clara. A súa baixa densidade faia inconfundible. A súa composición mineralóxica pode ser similar á da riolita ou traquita.

• Rochas Piroclásticas

  Formadas a partir do material fragmentario (piroclastos) expulsado polo volcán.

  • Tufo: Resulta da unión dos piroclastos a causa das altas temperaturas ás que son expulsados polo volcán.
  • Brecha Volcánica: Composta por fragmentos grosos de rochas unidos por cinzas e lapilli.

Rochas Ígneas Subvolcánicas

Orixínanse cando o magma queda preto da superficie. O seu arrefriamento prodúcese a unha velocidade intermedia, resultando en rochas con características intermedias entre as volcánicas e as plutónicas.

• Aplito: Presenta textura holocristalina, homométrica e de gran fino. De cor gris clara, a súa composición é similar á do granito.
• Pórfiro Granítico: De textura holocristalina, con cristais moi grandes envoltos nunha matriz microcristalina. A súa composición é similar á do granito.
• Diabase: Holocristalina, con grans de tamaño fino e medio. De cor verde, a súa composición é similar á do basalto.