Haurtxoen Garapen Motorra: Lehen Urteko Fase Gakoak

Haurtxoen Garapen Motorraren Faseak

Lehen Fasea: Ahoz Gorako Jarreraren Abantailak

Haurra ahoz gora etzanda dagoenean, hainbat onura lortzen ditu bere garapen goiztiarrerako:

1. Agitazioak eta bulkadak modu eraginkorrean agertzen dira, deskarga toniko-emozional, ariketa funtzional edo adierazpide gisa.
2. Inguruneari beha diezaioke, gorputzeko tentsioak erregulatu, nahieran mugitu, bere beharrak adierazi eta espazio jakin horretan kokatu.
3. Heldua egoera hobean dago haurraren adierazpenak ulertzeko, eta horrek komunikazioaren garapenaren oinarriak finkatzea ahalbidetuko du.
4. Haurraren esnatzea modu progresibo eta harmonikoan gertatzen da; kontzientzia-maila batetik bestera igarotzeko behar diren denboren erregulazio autonomoa errazagoa da. Ikusten da haurrak umore onez esnatzen direla; izan ere, ez dute negar egin beharrik norbaitek jarreraz alda ditzaten. Eskuekin jolasean, sehaskako maindireak mugitzen edo inguruari begira egoten dira.

Bigarren Fasea: Biraketa (4-8 hilabete)

Fase hau 4. eta 8. hilabetearen artean ikasten da. Dena den, gerta liteke geroago agertzea, inguruneko edo faktore biologiko batzuen ondorioz. Buruak hasten du gorputzaren errotazio-mugimendua. Gorputza mugituz lortzen da posizioa. Gorputzaren jarrerak zehazten eta baldintzatzen du esplorazio- eta lokomozio-jarduera. Buruak norabidea finkatzen du. Posizio hori sekuentzia bateko lehen elementua da; enborra gero eta bertikalago jartzen da, eserita, belauniko eta, azkenik, zutik jarri arte. Gorputza espazioan mugitzeko behar diren espazio-erreferentziak lortuko ditu.

Hirugarren Fasea: Lekualdatze Birakaria (4-10 hilabete)

Fase honetakoak dira bi jokabide hauek: “behin eta berriz biratzea” (4-9 hilabete) eta “biraka lekuz aldatzea” (6-10 hilabete). Jarrera horiek eskuen erabilerarekin lotutako eskemekin batera garatzen dira. Urrun samar dagoen objektu bat hartzeko edo helduengana hurbiltzeko eta haiengandik urruntzeko bide bat dira. Funtsezkoak dira lateralitatea garatzeko, eta nozio hori oso garrantzitsua da gorputza espazioan kokatzeko eta lekualdatzeko.

Laugarren Fasea: Narrasean Ibiltzea (7-13 hilabete)

Narrasean ibiltzea atzera eta aurrera mugitzen hastea da. Oro har, 7. eta 13. hilabeteen artean ikusten da. Mugimendu horiek, biraka ibiltzearekin eta lau oinean jartzearekin batera, gorputzeko muskuluak prestatzen dituzte eserita eta zutik egoteko. Jarrera-errepertorioa zabaldu eta gero eta sekuentzia konplexuagoak agertzen dira, koordinazioa, plastikotasuna eta harmonia ezaugarri dituztenak. Pixkanaka, gero eta gehiago altxatzen du enborra lurretik, “lau oinean” jarri arte; alegia, enborra lurretik erabat bereizi eta horizontalki jartzea lortzen duen arte.