Hortzen Anomaliak: Kopurua, Tamaina eta Forma

Hortz Kopuruaren Anomaliak

Hortz kopuruan eragina duten anomaliak bi motatakoak izan daitezke:

1. Hortz Eskasia Eragiten Duten Anomaliak (Agenesia)

Behar baino hortz gutxiago daudenean ematen diren anomaliak dira, hortz germenak sortu ez direlako. Anomalia hauei agenesia ere deitzen zaie. Falta den hortz kopuruaren arabera, mota desberdinetako agenesiak daude:

• Anodontzia: Hortz guztiak falta dira.
• Oligodontzia: 6 hortz baino gehiago falta dira.
• Hipodontzia: 6 hortz edo gutxiago falta dira.

Hortz baten edo biren falta maiztasun handiarekin aurkitzen den anomalia da, eta ohikoenak 3. haginen, beheko 2. premolarren eta goiko alboko ebakortzen agenesiak dira; hortz horien falta hereditarioa izan ohi da.

2. Gehiegizko Hortz Kopurua Eragiten Duten Anomaliak (Hipergenesia/Hiperodontzia)

Behar baino hortz gehiago daudenean ematen diren anomaliak dira; anomalia hauei hipergenesia edo hiperodontzia deitzen zaie eta sortzen diren soberako hortzei hortz supernumerarioak deritzen zaie. Askotan hortz supernumerarioek forma edota tamaina anormala izaten dute. Kokatzen diren lekuaren arabera hortz supernumenarioek izen desberdina hartzen dute:

• Mesiodens: Goiko erdiko ebakortzen artean kokatzen direnak.
• Peridens: Haginaurrekoen inguruan kokatzen direnak.
• Paramolarrak: Haginen bestibular edo palatino/ lingualetik kokatzen direnak.
• Distomolarrak: 3. haginaren alde distalean kokatzen direnak.

Hortzen Tamainaren Anomaliak

Hortzek, beste hortzekin konparatuz, tamaina desproportzionatua daukatenean ematen den anomalia da. Hortz batek dagokiona baino tamaina handiagoa duenean makrodontzia deitzen da eta dagokiona baino tamaina txikiagoa duenean, berriz, mikrodontzia.

Hortzen Formaren Anomaliak

Hortz batek edo batzuek forma desberdina edo ezohikoa dutenean eman. Mota desberdinak daude:

1. Hortz Osoaren Formaren Anomaliak

• Konoidismoa: Ohikoena. Koroak eta sustraiak kono itxura dutenean. Batez ere goiko alboko ebakortzetan ematen da.
• Taurodontismoa: Hortz-mamia behar baino handiagoa denean.
• Dens in dente edo hortz inbaginatua: Garapenean zehar hortzaren ehunak hortzaren barnealderantz tolesten direnean, hortz baten barruan beste bat sortuz. Arazoak egon daitezke hortz horien endodontzia egin behar bada.

2. Koroaren Formaren Anomaliak

• Kuspide gehigarrien presentzia: Hortzak dagokiona baino kuspide gehiago dituenean.

3. Sustraiaren Formaren Anomaliak

• Sustrai gehigarrien presentzia: Hortzak dagokiona baino sustrai gehiago dituenean.
• Sustrai falta: Hortzak dagokiona baino sustrai gutxiago dituenean.
• Hortz-dislazerazioa: Sustraiaren kurbadura handia denean, hau da, sustraiaren norabidea bat-batean aldatzen denean. Dislazerazioa duen hortzaren endodontzia eta exodontzia egiteko zailtasunak egon daitezke.

Hortzen Arteko Loturak Eragindako Anomaliak

Bi hortz lotuta daudenean ematen diren anomaliak dira. Mota desberdinak daude:

• Fusioa: Hortzak garatzen ari direnean bi hortz-germen arrunten arteko lotura ematen denean. Ondorioz hortz bat faltako da.
• Geminazioa: Hortzak garatzen ari direnean hortz-germen bat zatitzen denean. Hortz-germena guztiz zatitu izan balitz, hortz supernumerario bat agertuko litzateke. Ez da hortzik faltako.
• Konkreszentzia: Bi hortz euren sustraietatik lotuta daudenean. Zailtasunak egon daitezke konkreszentzia duten hortzen exodontzia egiteko.