Linguas Minorizadas e Minoritarias: Unha Visión Xeral

Se nunha comunidade hai dúas linguas en contacto, estas reproducen a xerarquía que hai dentro dela; unha das linguas vai ocupando progresivamente os ámbitos da outra provocando a súa substitución.

Lingua Minorizada vs. Lingua Minoritaria

O concepto de lingua minorizada é sociolingüístico e nada ten que ver co de lingua minoritaria que é cuantitativo, pode suceder que unha lingua minorizada sexa a máis falada nunha comunidade.

Diversidade Lingüística e o Caso Europeo

A complexidade de composición da poboación dunha área así como os movementos da poboación fan imposible un acordo entre o número de linguas que se falan no mundo e os falantes que posúe cada unha. No caso europeo case todos os estados son plurilingües e a convivencia das linguas de cada comunidade ou estado, desenvólvese no plano diglósico. Hai gran cantidade de linguas minorizadas pertencentes a comunidades que en moitos casos están divididas por fronteiras políticas xa que non sempre os límites dunha comunidade lingüística ou histórica coinciden cos límites do estado.

Situación das Linguas Minorizadas

O estatus e o nivel do uso das linguas minorizadas en case todas é minoritario. É dentro do estado español onde estas linguas gozan dun maior estatus e son empregadas en ámbitos impensables para outras. O marco legal asenta as bases para a recuperación e normalización da lingua mais é necesaria a intervención dos sectores sociais que son:

Accións para a Recuperación Lingüística

• Acción política: exercida polas administracións públicas, imprescindible para a normalización lingüística por coherencia e imperativo legal.
• Acción colectiva: exercida por asociacións colectivas, xogan un papel importante fronte á desidia e esquecemento do grupo anterior.
• Acción individual: supón o esforzo individual e consciente contra hábitos e conductas de desleixo cara á situación da lingua.

Dinamización e Concienciación

Para o éxito destas accións é necesario un proceso de dinamización co obxecto de crear actividades positivas cara ao idioma implicando activamente a colectivos e individuos que promovan o uso da lingua ademais de concienciar e sensibilizar os axentes públicos provocando un cambio na conduta social.