Poboación e Economía de Europa no Século XVII

Poboación e economía de Europa

Estancamento demográfico

A poboación europea creceu pouco no século XVII, pasando de 106 a 130 millóns de persoas. As causas deste escaso crecemento foron:

• As malas colleitas.
• A dureza da Guerra dos Trinta Anos.
• O rebrote da peste (1650-1670).

En moitos países, especialmente nos mediterráneos e no sur de Europa, a poboación decreceu.

Crise agraria e artesanal

A produción agraria descendeu polas anomalías climáticas, as guerras e as deficiencias técnicas. Esta crise afectou principalmente a Europa oriental e mediterránea. Pola contra, os Países Baixos e Inglaterra adoptaron novas técnicas para conservar a fertilidade do solo, como a substitución do barbeito por plantas forrageiras e a selección das especies mellor adaptadas.

A artesanía urbana entrou en crise, xa que o control dos gremios impedía o seu desenvolvemento. Algúns países iniciaron novas formas de produción: as manufacturas, grandes talleres onde traballaban numerosos artesáns a soldo dun empresario.

Comercio e capitalismo financeiro

O comercio alcanzou un grande auxe, sobre todo en Holanda, Inglaterra e Francia. Estes países aproveitaron a debilidade de Portugal e España para comerciar cos seus imperios americanos, potenciaron cultivos coloniais (azucre, tabaco e café) e o tráfico de escravos desde África. Ademais, crearon os seus propios imperios coloniais e fundaron compañías privilexiadas.

O capitalismo financeiro impulsou os préstamos, as sociedades por accións e a apertura de bolsas, onde se compraban e vendían accións das compañías comerciais. A primeira bolsa abriuse en Anveres (1531).

Mercantilismo

Esta teoría e práctica económica sostiña que a riqueza dun país residía na cantidade de metais preciosos que atesoraba. Para incrementala, defendía a intervención do Estado na economía e a conquista de novos mercados.

Intervención do Estado

• Fomentar as vendas ao exterior.
• Impulsar as manufacturas nacionais.
• Prohibir a saída de materias primas do país.
• Impoñer impostos aos produtos estranxeiros.

Conquista de novos mercados

Estes mercados proporcionaban materias primas e compraban manufacturas.

Modelos de mercantilismo

• Francés: Aplicado por Colbert, ministro de Luís XIV; fomentou a agricultura, as industrias estatais e o comercio exterior.
• Inglés: Promoveu a industria e o comercio exterior.
• Español: Baseouse na acumulación de metais preciosos.