Grandes figuras da literatura galega contemporánea: autores e obras fundamentais

Principais autores da literatura galega contemporánea

Un percorrido polas figuras máis sobranceiras das letras galegas do século XX, os seus contextos vitais e as súas creacións literarias máis destacadas.

Álvaro Cunqueiro

Naceu en 1911 en Mondoñedo, vila que tería unha grande importancia na súa obra. Estudou en Santiago de Compostela cando a cidade tiña unha relevante vida artística e cultural. Foi daquela cando comezou o seu labor literario, plasmado en tres importantes libros de poesía:

• Mar ao norde (1932)
• Poemas do si e do non (1933)
• Cantiga nova que se chama riveira (1933)

Na Guerra Civil viviu un tempo en Ortigueira, dedicado á docencia e ao xornalismo. Ao concluír o conflito bélico exerceu a práctica xornalística en Donostia e Madrid ata que retornou, en 1947, á súa vila natal. Cando se fundou a editorial Galaxia, Cunqueiro, animado polo seu amigo Francisco Fernández del Riego, comezou a escribir textos narrativos en galego. Froito desa actividade son:

• Merlín e familia (1955)
• As crónicas do sochantre (1956)
• Se o vello Sinbad volvese ás illas (1961)

No ámbito teatral e dramático destacan obras como O incerto señor don Hamlet, príncipe de Dinamarca (1959) e A noite vai coma un río (1974).

Ánxel Fole

Naceu en Lugo en 1903. Aínda que fixo estudos de Dereito en Valladolid, Madrid e Santiago de Compostela, a súa vida estivo estreitamente ligada á súa cidade natal. Cando se iniciou a Guerra Civil, xa estaba introducido nos círculos culturais e políticos ligados ao Partido Galeguista. A represión desatada tras a contenda bélica fixo que marchase ás terras do Courel e do Incio, zonas montañosas e mal comunicadas do sur da provincia, nas cales permaneceu durante anos.

En 1953, Fole regresou a Lugo e comezou a traballar como xornalista en El Progreso, un posto desde o que desenvolveu un amplo labor cultural, paralelo ao seu traballo como narrador. Finou no ano 1986. En 1997 dedicóuselle o Día das Letras Galegas.

Representantes da Nova Narrativa Galega

Outros nomes esenciais vinculados a esta etapa renovadora son Gonzalo Rodríguez Mourullo, Xohán Casal e Camilo Gonsar.

Xosé Luís Méndez Ferrín

Naceu en Vilanova dos Infantes (Ourense) en 1938. Estudou en Santiago de Compostela e Madrid, cidade na que foi un dos fundadores do grupo Brais Pinto. Publicou o seu primeiro libro de relatos, Percival e outras historias, cando só tiña 20 anos.

Tamén se poden encadrar dentro da Nova Narrativa Galega (NNG) outras das súas obras como O crepúsculo e as formigas e Arrabaldo do norte. Logo, na década de 1970 publicaría un relato breve cheo de simboloxía política, Retorno a Tagen Ata; outro libro de contos, Elipsis e outras sombras; e a novela Antón e os inocentes.

A partir de 1980, Ferrín publicou algunhas das súas mellores obras:

• Arraianos
• Arnoia, Arnoia
• Bretaña, Esmeraldina
• No ventre do silencio

Xosé Neira Vilas

Naceu en Gres (Vila de Cruces) en 1928 e faleceu na mesma localidade en 2015.

Carlos Casares

Naceu en Ourense en 1941 e morreu en Vigo en 2002. Estudou en Santiago de Compostela, cidade na que entrou en contacto con representantes fundamentais do galeguismo, como Ramón Piñeiro, quen exerceu unha grande influencia sobre el. Ao longo da súa traxectoria foi director da editorial Galaxia e da revista Grial.

María Xosé Queizán

María Xosé Queizán naceu en Vigo en 1939. Dende moi nova estivo ligada aos movementos literarios e políticos da súa xeración. Ademais, é salientable o seu destacado labor como teórica do movemento feminista.