A Poesía Galega dos Anos 50 e o Grupo Brais Pinto

A Xeración das Festas Minervais

Son os poetas nados entre 1930-40 que se deron a coñecer a través dos certames literarios das Festas Minervais, celebrados en Santiago nos anos 50. Nestes autores podemos observar as seguintes liñas poéticas:

• A Escola da Tebra: utiliza unha poesía onde predomina un sentimento de angustia e desesperación ante a vida; para describila utilizarán imaxes nas que predominan as sombras e a escuridade.
• O socialrealismo: continuador de Celso Emilio Ferreiro, con poesía de denuncia social con temas como a guerra, a falta de liberdade e a opresión.
• O paisaxismo renovador: observamos nalgúns destes autores unha visión innovadora da paisaxe; o home, unido á natureza, reflexiona sobre a súa existencia.

Os autores máis importantes desta xeración serán os integrantes do grupo Brais Pinto, formado por universitarios partidarios do nacionalismo marxista. Destacan neste grupo os seguintes autores:

Xosé Luís Méndez Ferrín

Caracterízase por unha traxectoria variada que podemos sintetizar nas seguintes liñas:

• Voce na néboa: é unha obra que se insire na poesía existencialista e angustiada da Escola da Tebra.
• Baixo o pseudónimo de Heriberto Bens, escribe obras de contido social cunha mensaxe política revolucionaria.
• A súa obra Con pólvora e magnolias supuxo a renovación poética e a superación do discurso socialrealista, onde só importaba a mensaxe. O título é significativo do seu contido: por unha banda temos a poesía política e revolucionaria (pólvora) e, por outra banda, a preocupación pola estética, a musicalidade e o lirismo intimista (magnolias). O tema principal da obra é o compromiso social e patriótico dende unha posición claramente nacionalista e revolucionaria, pero ademais están presentes motivos como a morte, o paso do tempo, o erotismo e o gozo da vida.

Manuel María

Caracterízase por expresar na súa obra as seguintes correntes:

• O existencialismo da Escola da Tebra.
• A poesía paisaxística, describindo a súa bisbarra natal no libro Terra Chá.
• A crítica social, onde denuncia a falta de liberdade da sociedade, como aparece no poema “Bando”.

Uxío Novoneyra

Desenvolve as seguintes liñas poéticas:

• O paisaxismo innovador, onde o home en soidade, unido á natureza, reflexiona sobre a súa existencia. Obras destacadas: Os eidos e Elexías do Courel.
• A poesía social e política, representada en obras como Do Courel a Compostela. O poema que mellor reflicte esta liña poética é “Letanía de Galicia”, onde utiliza un recurso formal do campo relixioso.

Outros autores destacados

Tamén pertencen ao grupo Brais Pinto autores como Bernardino Graña e Antón Avilés de Taramancos. Outros autores desta xeración, aínda que non pertencentes ao grupo Brais Pinto, inclúen a Xohana Torres.