Xestión da Calidade, Eficiencia Enerxética e Documentación Técnica en Proxectos

O Plan de Calidade e a Xestión de Proxectos

O obxecto do Plan de Calidade é definir un proceso que permita xestionar o cumprimento e seguimento do desenvolvemento dun proxecto en todas as súas fases, e está dirixido tanto ao equipo redactor, ás empresas contratistas e ao promotor. Ten o fin de establecer as medidas de aseguramento da calidade do proxecto durante a súa realización.

Convén que o contido do Plan de Calidade se basee en estándares de normalización, como pode ser a norma ISO 10005 para a xestión do plan e nun sistema de calidade documentada da organización do proxecto, segundo as normas ISO 9000.

Eficiencia Enerxética e Sostibilidade

A eficiencia enerxética pódese definir como a redución do consumo de enerxía mantendo os mesmos servizos enerxéticos, sen diminuír o noso confort e calidade de vida, protexendo o medio ambiente, asegurando o abastecemento e fomentando un comportamento sostible no seu uso.

A redución do consumo enerxético é unha das principais preocupacións de empresas, organismos oficiais e privados, así como dos gobernos. Por ese motivo, a procura de fórmulas que permitan reducir o consumo de enerxía, e de aminorar o impacto medioambiental, é un cometido que deben afrontar todas as compañías, e por suposto as operadoras de telecomunicacións.

Tipos de Manuais Técnicos

• Manual de instrucións: Documento no que se explica paso a paso como realizar certa tarefa. No caso dunha instalación de telecomunicacións ou informática indicará de forma secuencial (ordenada) as accións que se deben realizar para a posta en marcha da instalación ou sistema informático.
• Manual de servizo: Nel se detallan as guías dedicadas á reparación de equipamentos e sistemas. Os manuais de servizo inclúen planos, características técnicas e de orientación en relación coa reparación e mantemento das instalacións.
• Manual de usuario: Útil e imprescindible para aquelas persoas que utilicen o sistema, debe incluír toda a información necesaria: instalación, utilización, configuración e outras operacións rutineiras como copias de seguridade, diagnose e mensaxes de erro.