Lehen Sorospenetako Oinarrizko Gida

Lehen Sorospenetako Laburdura Nagusiak

• BAS edo BAL (PAS): Babestu, abisatu eta sorostu/lagundu.
• ABC: Lehen mailako balorazioa: arnasbidea, bentilazioa eta zirkulazioa.
• BKM (MFM): Bekoki-kokots maniobra.
• IES (VOS): Ikusi, entzun eta sentitu.
• ASJ edo ASP (PLS): Alboko segurtasun-jarrera/posizioa.
• BBG (PCR): Bihotz-biriketako gelditzea.
• GAAB (OVACE): Gorputz arrotzek arnasbideetan eragindako buxadura.
• BBB (RCP): Birika-bihotz bizkortzea.
• OBE (SVB): Oinarrizko bizi-euskarria.
• KDA (DEA): Kanpoko desfibriladore automatikoa.
• KDSA (DESA): Kanpoko desfibriladore semiautomatikoa.

Kanpoko Odoljarioen Aurreko Pausoak

1. BAS protokoloa aplikatu.
2. ABC balorazioa egin.
3. Biktima shockaren aurkako jarreran kokatu (anti-shock).
4. Odoletan dagoen gorputz-atalean presioa egin.
5. Gorputz-atala altxatu.

Erredura Termikoen Aurreko Pausoak

1. Kaltetua bero-iturritik urrundu eta soroslearen babesa zaindu behar da.
2. Erreta dagoen atala hoztu egin behar da:
   • Ura isuri behar da erreduraren gainean, baina presiorik egin gabe.
   • Erretako atala urpean sartu, edo ur hotzez bustitako gasekin erredura bildu.
3. Lehen eta bigarren mailako balorazioa egin behar da. Arnasbidea egoera onean dagoela ziurtatu behar da. Arazo hori zantzu hauen seinale izan daiteke:
   • Sudurreko ile kiskaliak.
   • Aho inguruko eta aho barneko erredurak.
   • Ahoa kedarrez beteta.
   • Ahots-aldaketak.
   • Eztula...

   Mota honetako kaltetuek ahalik eta kontzentrazio altueneko oxigenoa behar dute gehienetan.

4. Erre den gorputz-eremuko arropa kendu behar da, baina azal erreari itsatsita dagoena kendu gabe.
5. Metalezko objektuak kendu behar zaizkio, beroa gorde dezaketelako. Modu berean jokatu behar da gorputz-atalen bat estutzen ari den edozerrekin ere.
6. Mantaren bat erabili behar da zaurituak berorik ez galtzeko.
7. Ez da pomadarik edo ukendurik erabiliko. Babak ez dira zulatu behar, azal hori babes-funtzioa betetzen ari baita; gaza hezeak erabiliz babestu ditzakegu, gaza esterilak eta sueroa badaukagu.
8. Oin edo eskuetan erredurarik badago, behatz edo hatz erreak banandu behar dira, bestela azala itsatsi egin baitakioke.