Musika eta Mugimendua: 6 Jarduera Didaktiko Haurrentzat

1. Zazpi Jauzi Dantza

Zer lantzen da: Dantza honen bidez haurrek koordinazio motorea, erritmoaren jarraipena eta gorputzaren kontrola lantzen dituzte. Era berean, memoria eta arreta garatzen dira, pausoen sekuentzia gogoratu behar baitute. Bestalde, zirkuluan egiteak sozializazioa eta talde-lana indartzen ditu.

Nola egin: Ikasleak zirkulu batean kokatzen dira, eskutik helduta edo libre. Irakasleak pausoen sekuentzia sinple bat erakusten du (adibidez: pausoak aurrera, saltoak, belaunaren ukitzea…). Musikaren erritmoari jarraituz, pausoak errepikatzen dira eta pixkanaka zailtasuna handitzen da, jauzi gehiago gehituz. Garrantzitsua da hasieran mugimenduak motel eta argi erakustea, eta gero erritmoa bizkortzea. Amaieran, ikasleek beraiek proposatu ditzakete jauzi berriak.

2. Kokoleoko Abestia

Zer lantzen da: Abesti honekin intonazioa eta ahotsaren kontrola lantzen dira, baita gorputz perkusioa ere (eskuak, hankak, bularra…). Horrez gain, entzumen aktiboa, koordinazioa eta hizkuntza musikala garatzen dira. Kultura arteko balioak ere lantzen dira, beste herrialde bateko abestia delako.

Nola egin: Lehenik, abestia entzun eta letraren esanahia azaldu. Ondoren, zatika ikasi (imitazio bidez). Behin abestia barneratuta, gorputz perkusio mugimenduak gehitzen dira: adibidez, pultsuarekin eskuak jo, edo silaba bakoitzarekin kolpe bat egin. Pixkanaka, erritmo konbinazioak sartzen dira. Azkenik, taldeka egin daiteke, bakoitzak perkusio mota bat eginez.

3. Eko Erritmikoak Koloretako Paperekin

Zer lantzen da: Jarduera honetan nagusiki lantzen dira erritmoa eta bere elementuak: pultsoa, azentua eta iraupena. Horrez gain, memoria, arreta eta entzumen gaitasuna garatzen dira, irakasleak egindakoa errepikatu behar baitute.

Nola egin: Irakasleak kolore bakoitza kolpe mota batekin lotzen du (adibidez: gorria = esku kolpea, urdina = mahaia, berdea = txaloa). Ondoren, kolore sekuentzia bat erakusten du eta erritmo bat egiten du. Ikasleek “eko” moduan errepikatu behar dute. Hasieran erraza izango da, baina pixkanaka sekuentzia luzeagoak eta konplexuagoak egingo dira. Amaieran, ikasleek beraiek sortu ditzakete erritmoak.

4. Euliak eta Dortokak

Zer lantzen da: Jarduera honek entzumen aktiboa, kontraste musikala (azkarra/motela) eta gorputz adierazpena lantzen ditu. Era berean, irudimena eta sormena garatzen dira.

Nola egin: Ikasleek musika entzuten dute lehenik, eta irakasleak azaltzen du bi zati daudela:

• A zatia (azkarra): euliak.
• B zatia (motela): dortokak.

Ondoren, musika berriz jartzen da eta ikasleak espazioan mugitzen dira: A zatian azkar eta arin (euli moduan), eta B zatian poliki eta astiro (dortoka moduan). Garrantzitsua da mugimendu librea izatea baina musikaren aldaketetara adi egotea.

5. Ramonen Dantza

Zer lantzen da: Proposamen honek pultsuaren barneratzea, egitura musikala (A-B), koordinazioa eta adierazpen librea lantzen ditu. Gainera, jolas kooperatiboa sustatzen du.

Nola egin: Ikasleak zirkulu batean jartzen dira.

• A zatian: pultsuari jarraituz ibiltzen dira biribilean, eta esaldiaren amaieran kolpeak egiten dituzte.
• B zatian: zirkulua apurtzen da eta ikasleek mugimendu librea egiten dute (dantza, jauziak…).

Garrantzitsua da ikasleek bi zatien arteko desberdintasuna identifikatzea.

6. Another One Bites the Dust

Zer lantzen da: Abesti honekin zentzu erritmikoa, pultsua eta koordinazioa lantzen dira. Gainera, tinbre desberdinak ezagutzen dira eta talde-lana sustatzen da.

Nola egin: Ikasleei plastikozko botilak ematen zaizkie. Lehenik, botilekin sortu daitezkeen soinuak esploratzen dira. Ondoren, abestiaren erritmo nagusia lantzen da. Bi tinbre edo soinu mota aukeratzen dira eta ikasleak bi taldetan banatzen dira: talde batek erritmo bat egiten du, besteak beste bat. Azkenik, taldeek batera jotzen dute, erritmo koordinatua sortuz.