O Diñeiro, os Activos Financeiros e o Mercado de Valores

O Diñeiro e as Súas Funcións

Diñeiro: Medio de cambio e pagamento xeralmente aceptado pola sociedade.

Troco: Intercambio directo de bens e servizos sen mediar a intervención do diñeiro.

Tipos de diñeiro

• Diñeiro mercadoría: Ben que ten un valor por si mesmo e é utilizado como medio de cambio polos membros dunha sociedade. Debe ser facilmente transportable, duradeiro, divisible en partes e escaso. Exemplo: metais preciosos, ou hoxe en día as moedas.
• Diñeiro papel: Certificado emitido por unha entidade bancaria ou por un ourive para dar constancia de que unha persoa realizou un depósito de ouro e que pode ser cambiado por ouro cando o seu propietario o decida. Apareceu na Idade Media; hoxe en día chámanse billetes e só os emiten os bancos centrais.
• Diñeiro fiduciario: Diñeiro que basea o seu valor no crédito e na confianza que merece quen o emite. Non é convertible en ouro, é creado polo Banco Central e a súa aceptación está establecida por lei.

Funcións do diñeiro

• Medio de cambio: Intermediario que facilita o comercio e a especialización na produción; xeralmente é aceptado por todos.
• Depósito de valor: Medio para manter a riqueza e que nos permite aforrar.
• Unidade de conta ou de medida: Permítenos medir e comparar o valor dos diferentes bens e servizos.

Que son os Activos Financeiros?

Son títulos-valor que constitúen o recoñecemento dunha débeda por parte de quen os emite e que lle permiten ao propietario o seu cobro.

Características dun activo financeiro

• Rendibilidade: É o rendemento ou beneficio que o investidor obtén del. Cando se coñece o rendemento de antemán, o título é de renda fixa; se depende de como marche a empresa, denomínase de renda variable.
• Risco: Depende do prazo de recuperación e das garantías de devolución da débeda cando esta venza.
• Grao de liquidez: Depende da facilidade coa que o activo pode converterse en diñeiro efectivo sen incorrer en grandes perdas ou custos.

A Emisión de Obrigas e Accións

Cando as empresas precisan cantidades importantes de diñeiro, dispoñen de dúas vías privilexiadas de financiamento:

1. Emisión de accións: Permite ás Sociedades Anónimas reunir grandes cantidades a través de achegas de capital. A empresa divide o capital en partes iguais para a súa venda, chamadas accións.
2. Emisión de obrigas e bonos: As empresas e o sector público poden obter fondos mediante a venda de bonos ou obrigas, onde se divide a débeda que se asume e se vende ao público.

Diferenzas esenciais entre accións e obrigas

Son produtos moi diferentes:

• O accionista é propietario dunha parte proporcional da empresa; o posuidor dunha obriga é un acredor da empresa.
• Se a empresa obtén beneficios, os accionistas participan deles (dividendos), mentres que os titulares de obrigas só reciben o xuro previamente pactado.
• Se a empresa atravesa dificultades económicas, os titulares de obrigas recibirán igualmente os seus xuros segundo o pactado, pero os accionistas poden non cobrar nada.
• Por estas razóns, as accións teñen máis risco e maior expectativa de rendibilidade que as obrigas.

O Mercado de Valores e a Bolsa

Mercado de valores: Mercado especializado na compravenda de toda clase de títulos (accións, bonos, obrigas...) cuxa función principal é canalizar o aforro cara ao investimento.

• Mercados primarios ou de emisión: Son aqueles nos que se venden os títulos por primeira vez (activos de nova creación).
• Mercados secundarios: Son aqueles nos que se negocian os títulos xa existentes, os cales poden ser revendidos infinidade de veces.

As Bolsas de Valores e a súa regulación

Para o correcto funcionamento do sistema existen:

• A Lei do Mercado de Valores, que establece o marco legal vixente.
• A Comisión Nacional do Mercado de Valores (CNMV), que garante a transparencia do mercado, a correcta formación dos prezos dos activos negociados e a protección dos investidores que interveñen.